Korrupsaun, Koluzaun no Nepotizmu (KKN)
CEPAD serbisu hodi prevene korrupsaun iha nivel oin rua
- Hakbi’it kuiñesimentu publiku kona-ba korrupsaun liu husi kampaña permanente edukasaun sivika; no
- Promove implementasaun ba politika nasional, lejislasaun no programa mak reflete rekomendasaun ho baze iha konsensus hodi hatan ba korrupsaun, koluzaun no nepotizmu, liu husi konsultasaun ida inkluzivu no partisipativu ho komunidade sira iha rai laran.
Komemora Loron Mundial Anti-Korrupsaun
Loron Mundial Anti-Korrupsaun tinan-tinan selebra iha 9 Dezembru, no iha tinan ida ne’e CEPAD hamutuk ho membrus GKN-AK no instituisoens anti-korrupsaun estadu-nian organiza eventu publiku ida iha 30 Novembru hodi marka Loron Mundial Anti-Korrupsaun hodi hakbít kuñesimentu publiku kona ba korrupsaun. Iha eventu ne’e mos membrus GKN-AK aproveita hodi promove Ukun-Fuan 5 Anti-Corruption, mak sira rasik elabora no disemina mos mensajen Anti-Korrupsaun ida husi Na’I Ulun Prezidente Francisco Guterres “Lú-Olo”.
CEPAD halo lansamentu ba Manual Treinamentu Anti-Korrupsaun
Iha 26 Outubru 2018, CEPAD lansa Manual Treinamentu Anti-Korrupsaun foun ida ba Servidor Publiku sira atu oinsa hakbít INTEGRIDADE iha Setor Publiku. Na’I Ulun Prezidente Francisco Guterres “Lu-Olo” mak inaugura eventu ne’e hodi selebra mos rezultadu diak husi serbsiu CEPAD-nian, no Prezidente rasik rekuñese importansia ba kombate korrupsaun iha rai-laran. Elaborasaun ba Manual Treinamentu Anti-Korrupsaun ne’e hala’o ho kolaborasaun no konsulta hamutuk ho membrus Grupu Konsultivu Nasional-Anti Korrupsaun (GKN-AK) CEPAD nian mak kompostu husi liñas ministeriais hamutuk hitu (7) no inklui instituisoens xave anti-korrupsaun estadu-nian, hodi tulun hakbít kuñesimentu Servidor Publiku sira-nian kona ba knar no responsabilidade instituisoens anti-korrupsaun estadu-nian no Konvensaun UNCAC ho matadalan simples no pratiku ba Servidor Publiku sira atu oinsá prevene no kombate korrupsaun iha setor publiku.
Kampaiña permanente edukasaun sivika
Ho kolaborasaun hamutuk ho ministeriu edukasaun, CEPAD introduz kuinesimentu kona-ba saida mak KKN iha eskola laran,liu husi livru istória ‘Baino no Binoi, livru nebe’e integra ona nudar livru refernsia ba eskola primária klase 5 no 6 iha tinan 2014. Lansamentu ba livru ne’e hala’o iha 2015 iha munisipiu 13 iha Timor-Leste, involve eskola sentral 86, mestre/a no CEPAD nia pontu fokal, no estudantes klase 5 no 6 hamutuk 3,220.
Distribuisaun livru istoria “Baino no Binoi”
Livru istoria ne’e komplementa pakote anti-KKN CEPAD-nian, nebe’e konsisti husi manual Anti-korrupsaun, filme ‘Baino no Binoi, filme anti-korrupsaun lubuk ida, muzika anti-korrupsaun, entrevista iha radio no debates iha televizaun 1&2, livrus, manual treinamentu no barak seluk tan. Liu husi distribuisaun material hirak ne’e ba munisipius hotu, kombina ho diskusaun fokus grupu (DFG) 42 ho partisipantes membru komunidades sira hamutuk 10,494, CEPAD hasoru dezafius oin-oin no identifika ona oportunidade balu atu oinsa hakbiit liu tan programa KKN iha futuru.
Partisipante programa nian ida iha munisipiu Lautem dehan katak: “Hau hakarak lori livru istoria, DVDs no muzika anti-korrupsaun, tanba hau rasik hakarak atu estuda materia hirak ne’e. Hau hakarak fo ha’u-nia tempu voluntariamente hodi fahe informasaun ne’e ba ha’u-nia familia no kolega sira tanba sira mos laiha informasaun kona-ba saida mak korrupsaun, koluzaun no nepotizmu. Ho razaun ida ne’e hau kontente tebes hodi tuir DFG ne’e.
Adopta politika nasional, lejislasaun no programa públiku hodi hatan ba KKN
Liu husi grupu promotor ba transformasaun (GPT), ema wa’in sira hamutuk influensia instituisaun xave balu no hamosu mudansa. GPT grupu advokasia nebe’e halibur membrus hamutuk 26 no fasilita ligasaun entre peskiza, rekomendasaun politika, no implemtasaun pratika.
GPT grupu nebe’e orienta liu ba asaun ho mandatu hodi analiza rekomendasaun mak CEPAD elabora iha tinan 2011-2012 no ajusta rekomendasaun hirak neba hodi fasilita implementasaun. Knar seluk mak atu tulun maneja espasu politiku hodi asegura apoiu politiku no kompromisiu husi ema xave sira ne’ebé mak foti desizaun atu bele fó apoiu politika iha prosesu implementasaun laran iha tinan naruk tuir mai.
Parseiru no aliadus
Programa KKN CEPAD-nian la’o to’o ohin loron tanba parseiru ho MISEREOR ba tinan barak, no ho kolaborasaun hamautuk ho Interpeace. Durante implementasaun to’o ohin loron CEPAD serbisu besik liu ho instituisaun anti-korrupsaun estadu nian hanesan Komisaun Anti-Korrupsaun (KAK), Prokuradoria Jeral Repúblika (PJR), Provedoria Direitus Umanus no Justisa (PDHJ), no Organizasaun Global Parlamentar Kontra Korupsaun iha Timor-Leste (GOPAC-TL), inklui instituisaun estadu no liñas ministeriais hanesan Komisaun Funsaun Públika (KFP), Instituisaun Nasional no Administrasaun Públiku (INAP), Inspetór Jeral Estadu (IJE), Ministeriu Solidaridade Sosial no Inkluzaun (MSSI), Ministeriu Agrikultura no Peskas (MAP), Ministeriu Saude (MS), Ministeriu Edukasaun (ME) , Ministeriu Obras Públika (MOP), Ministeriu Finansas (MF) no Ministeriu Aprovisionamentu Estatal no Ordenamentu Teritóriu (MAEOT). CEPAD mos involve mídia hanesan Radio Metro FM, Televizaun Grupu Media Nasional (GMN-TV), Televizaun Edukasaun Timor (TVET), Radio no Televizaun Timor-Leste (RTTL), Radio no Televizaun Guardamor, Radio no Televizaun Maubere (RTM) no estasaun radio komunitáriu iha rai laran ba fó sai no halo reportajen kona-ba atividades programa nian.