CEPAD liu husi programa “Haforsa Akontabilidade Governu nian ba Covid-19” liu husi Promove Liberdade Asesu ba Informasaun iha Timor-Leste, ne’ebé hetan finansiamentu husi União Europea, realiza enkontru ho Grupu Trabailu Nasionál Liberdade Asesu ba Informasaun. Enkontru ne’e hala’o hodi aprezenta rezultadu prelimináriu husi atividades Diskusaun Fokus Grupu ne’ebé ekipa hala’o ona ho komunidade iha Postu Administrativu sanulu resin ida (11), hodi rona hikas sujestaun no rekomendasaun ruma husi membrus sira molok ekipa kontinua ho atividades Diskusaun Fokus Grupu  tuir mai no iha tempu  hanesan sei informa mos estratejia ba kampaiña advokasia iha nivel nasional atu enkoraja governu adopta no hatur prioridades xave hodi fasilita sidadaun sira liu-liu maluk feto sira nia asesu ba informasaun.

“Kampaña advokasia mak xave atu nune’e tau matan ba responsabilidade ukun nain sira nian kona-ba COVID-19 liu husi ezizensia ida, liu husi pedidu ida, liu husi partisipasaun ida, husi ita sidadaun ida-idak to’o komunidadeno nasaun tomak atu Nai ulun sira bele oinsa hatan ba nesesidade ita nian liu husi orsamentu ne’ebé iha liu husi rekursu ne’ebe iha ho uma forma responsabilidade, transparansia atu nune’e rekursu naton ka barak ne’ebe ita aposta iha COVID-19 bele benefisiu ba ita ida-idak, grupu, komunidade no nasaun tomak.” Haktuir Diretor Ezecutivu Sr. João Boavida iha introdusaun enkontru ho GTN.

“Ami JSMP sei kolabora ho CEPAD no ARCOIRIS sei hare ba dokumentu de intensaun (policy note) ne’ebe ohin dehan, hau sente ne’e buat ne’ebe importante tebes atu kumpri funsaun ba Liberdade no Asesu ba Informasaun, atu iha informasaun ho lolos, dalaruma ita koalia liberdade ba asesu informasaun maibe ita haluha tiha liafuan ho LOLOS ne’e, husi governu mak ne’e atu fo sai informasaun ho lolos, no kualidade laos fo deit ho kuantidade.” Haktuir Mana Paula iha ekontru ho GTN.

Enkontru ne’e hetan partisipasaun masimu husi membrus GTN hamutuk sanulu resin hitu (17) husi instituisaun estadu, organizasaun sosiedade sivil, religioza no individual balun ne’ebé sei hala’o kampaiña advokasia iha nivel nasional atu enkoraja governu adopta no hatur prioridades xave hodi fasilita sidadaun sira liu-liu maluk feto sira nia asesu ba informasaun. Kria lei asesu ba informasaun atu informa ema hotu.